当前位置:主页 > 家居 > 正文
中秋啜螺明目
发布机构:本站原创    发布时间:2021-11-29

  中秋未到,已经有朋友喺QQ上面改咗签名:“两日十斤田螺!”哈哈,其实除咗田螺,广州人过中秋时嘅应节食品仲有好多,月饼、碌柚、芋头、菱角、提子、哈密瓜……呢啲都系八月十五赏月必不可少嘅。

  广州人过节离唔开“食”——过年要炸油角蒸年糕,端午要包粽,就连过大暑小暑都要煲返个冬瓜汤。虽然广州人表面上好似好“为食”,但其实对于食,广州人除咗讲究味道之外仲讲究食物嘅文化同意头。例如上面提到嘅各种食物,样样都有段古仔噶。就攞众所周知嘅月饼来讲,从当年“莲香楼”出品嘅莲蓉馅糕点开始计起,月饼已经有百几年历史。依家全世界都知道莲香楼、广州酒家、陶陶居呢几家老字号嘅月饼先至系正宗嘅广式月饼。

  过节赏月,当然唔少得芋头。广州人中意将芋头隔水蒸熟,食嘅时候准备一碟盐,将芋头剥皮之后蘸小小盐然后再食。因为广东人剥芋皮时有“剥鬼皮”嘅讲法,所以中秋食芋头寓意辟邪消灾,而且有唔信邪嘅意思。至于食田螺,相信好多人都好在行。但系点解中秋要啜螺可能好多人都唔知。以前有种讲法系“中秋田螺可以明目”,呢个时候田螺腹内冇螺仔,特别肥美。炒嘅时候加多几片紫苏叶,就更加惹味喇。

  有人问我点样过中秋,我就话唔一定要上到摩天轮赏月先叫有情调。我会选择喺屋企阳台上摆个茶几,冲返壶靓茶,准备好上边提到嘅食物,帮囡囡点个灯笼,一家大细赏月追月!

织梦CMS官方 DedeCMS维基手册 织梦技术论坛
Power by DedeCms